Paroles
Je ne cesse de prier
A ma dame chiere
Que mes maus veille aligier.
Mais si se tient chiere
Et tant la truis dure et fiere,
Sans amolliier,
Qu’adoucir de ma priere
Ne puis son dangier.
S’en veil une autre acointier
Qui joie pleniere
M’otriera de ligier
Et a bonne chiere,
Sans fin, sans amour legiere,
Sans amenuisier;
Ne joye qu’a li s’affiere
Ne puet homs trier.
Et où porroit on querir
La joie qui amenrir
Ne puet ne finer
Et qui ne fait que doubler
En joieus plaisir?
Tout li mondes, sans mentir,
N’en porroit finer,
Sans la dame qui n’a per
Amer et chierir.
Mais ame ne puet perir
N’a dampnation venir
Qui son temps user
En li servir et loer
Vuet sans repentir;
Car qui siens, sans retollir,
Vuet tous demourer,
En gloire l’estuet regner
Qui ne puet faillir.
C’est celle qui par ordonnance
De Parole, et par la puissance
D’Esperit Saint, qui ouvra en ce,
Et par devine pourvëance
Faite au commandement dou Pere,
Conçut vierge, sans violence,
Porta vierge, sans desplaisance,
Enfanta vierge, sans grevance,
Li Fil Dieu qui prist no semblance
Pour nous tous getter de misere.
Mais n’i ha point de difference,
Car sil trois font toute une essence,
Une vertus, une substance,
Un pooïr, une sapience:
Ci ha trop merveilleus mistere.
Et si n’en fais nulle doubtance,
Car c’est ma foy, c’est ma crëance,
C’est ma vie et ma soustance,
Par celle qui par excellance
Est fille au Pere et dou Fil mere.
Ces trois un a po de peinne,
Assez prouver puis:
Considere une fonteinne,
Le ruissel, la duis;
Ce sont trois, mais ces trois truis
Tout un, soit petite ou pleinne,
Soit par pintes ou par muis:
Par tous ces conduis
Est eaue d’un goust certeinne;
Tous seurs un suis.
He! Roÿne souvereinne,
Qui seur toutes luis
Plus cler que la tresmonteinne
Es obscures nuis,
Aussi l’iaue et li dous fruis
De vie prist char humeinne
Et fourme en tes costes vuis.
S’est bien hors d’annuis
Et de fortune mondeinne
Cils que tu conduis.
Et qui de ceste eaue prendroit
Et la mettoit par un temps froit
En un vaissel, elle prendroit
Et jaleroit, si qu’on feroit
De la glace une ymage;
Mais ja son goust n’en perderoit
Ne mueroit, qu’adès seroit
Eaue et nature d’eaue aroit.
Chascuns le voit et aperçcoit
Par le temps yvernage.
L’eaue de vie einsi venoit
Et descendoit en tes flans droit,
Que Sains Esperis amenoit
Et conduisoit, dont il formoit
Le bel, le bon, le sage,
Qui Fils de Dieu le Pere estoit,
Qui consentoit et qui voloit
Que forme et char humeinne aroit
Et qu'il morroit et getteroit
D'enfer l'umein lignage.
Mais ceste Trinité est en eternité,
En possibilite et en toute autre chose,
En sens, en qualité, en gloire, en verité,
Une seule unité en Dieu le Pere enclose,
Qui par douce pité, par vraie humilité
Nous ha tous respité, quant en toy, douce Rose,
Prist nostre humanité le Fils par amité.
Ce nous ha tous getté, dont Sathans ne repose.
De la duis le Pere nomme,
De la fonteinne le Fil
Qui vient dou Pere et fu homme,
Dou ruissel cler et gentil
Saint Esperit; c'est la somme.
Dout Pere et dou Fil vient il.
Ces siz sont trois, qui bien somme
A entendement soutil.
[...]
